பங்குனி 30 வெள்ளிக்கிழமை (12 4 2024)
மறவன்புலவு க சச்சிதானந்தன்
சிவ சேனை
எழுதுகிறேன்
வெடுக்குநாறி அருகே ஒலிமடுவில் இன்று நடந்த நிகழ்ச்சிகளை நான் புரிந்தவாறு
கடந்த வாரம் நான் இந்தியாவிலிருந்து திரும்பியவுடன் வெடுக்குநாறி அருள்மிகு ஆதி சிவன் கோயில் பூசகர் மதிமுகராசா என்னைத் தொலைப்பேசியில் அழைத்தார்.
வவுனியா வடக்கு பிரதேச செயலாளர் வெடுக்குநாறிச் சிவன் கோயில் சிக்கல்கள் தொடர்பாக ஆய்வதற்கான கூட்டத்தில், தேர்தல் நடத்தி புதிய அறங்காவல் குழு உறுப்பினர்களைத் தேரக் கோரியதாக அவர் என்னிடம் கூறினார்.
ஏப்ரல் 12ம் தேதி வெள்ளிக்கிழமை ஒலி மடுவில் நடக்கும் கூட்டத்திற்கு வருமாறு மதிமுகராசா அழைத்தார்.
முன்பு போல் வர என்னிடம் வண்டி இல்லையே, என்னால் வர முடியாதே என்றேன்.
அரசியலார் தனி நன்மைக்காக, கட்சி ஆதாயங்களுக்காக, கோயிலைப் பார்க்கிறார்கள் என்று மதிமுகராசா என்னிடம் கூறினார். கோயிலை வழிபாட்டுக்காக மட்டுமான ஆட்சி அறங்காவல் குழுவை அமைக்க வேண்டும் என்றார்.
அந்தப் பகுதியைச் சேர்ந்த அரசியலற்றவர்களை உள்ளடக்கிய ஒரு தீர்வைக் காண்க என அவரிடம் கூறினேன்.
அத்தோடு அவர் அழைப்பையும் மறந்துவிட்டேன்.
இன்று காலை 8:30 மணிக்கு புளியங்குளம் சேர்ந்த தம்பா பிள்ளை என்னைத் தொலைப்பேசியில் அழைத்தார், "தயவுசெய்து ஒலிமடுவில் நடக்கும் கூட்டத்திற்கு வாருங்கள். அரசியலாரும் கிறித்தவரும் தங்களைப் புதிய குழுவிற்குள் தேர்ந்தெடுக்க முயல்கிறார்கள். உள்ளூர் மக்கள் அவர்களிடமிருந்து எச்சரிக்கையாக இருக்கிறார்கள்" என்று என்னிடம் கூறினார்.
என் இயலாமையை அவரிடம் சொன்னேன். என்னை ஒலிமடுவிற்கு ஓட்டிச் செல்ல அவர் தனது நண்பரைக் கண்டுபிடித்தார்.
கூட்டம் நடக்கும் இடத்தை நான் அடைந்தபோது, அது நடந்து கொண்டிருந்தது. புதிய குழுவைத் தேர்ந்தெடுப்பதில் உள்ள நன்மை தீமைகள் குறித்துப் பேசிக் கொண்டிருந்தனர்.
பூசகர் மதிமுகராசா, வேலன் சுவாமி, தமிழ்ச் செல்வன் (குழுச் செயலாளர்) ஆகியோருடன் மேடை வரிசையில் என்னை இருத்தினர்.
எனக்கு முன்னால் அரங்கில் சுமார் 25 பேர்களைப் பார்த்தேன், அவர்களுள் 6 அல்லது 7 பெண்கள்.
முதல் வரிசையில் பீட்டர் இளஞ்செழியன், இரவிகரன், தவபாலன் ஆகியோரும் இருந்தனர்.
சற்று நேரத்தில், தவபாலன் என்னைப் புத்த சார்பாளர் எனக் குற்றம் சாட்டத் தொடங்கினார், அதனால் எனக்கு கூட்டத்தில் இடமில்லை என்றார்.
அடுத்து ஒருவர் பேசினார். புத்தர்கள் எங்களை ஆக்கிரமிப்பாளர் என்றார். கிறித்தவர்கள் நம்மோடு இருப்பவர்கள். புதிய குழுவில் கிறித்தவர்களையும் சேர்ப்பது நல்லது. குழு உறுப்பினர் அனைவரும் வெடுக்குநாறியைச் சேர்ந்தவர்களாக இருக்க வேண்டும் என்றார்.
இந்துக் கோவில்களில் பரங்கிக்கு இடமில்லையே என்றார் செயமாறன். இந்தக் கூட்டத்தில் பரங்கியர் கலந்து கொள்ள முடியாதே என்றார்.
திருக்கேதீச்சரத்தில் வளைவை உடைத்தவர்கள் கத்தோலிக்கரே என்றார் தம்பா பிள்ளை.
பீட்டர் இளஞ்செழியன் கூட்டத்திலிருந்து எழுந்து வெளியேறினார்.
தொடர்ந்து இரவிகரனும் தவபாலனும் அரங்க முன் நடையில் அவருடன் இணைந்தனர்.
மூவரும் சற்று நேரத்தில் திரும்பினர். முன்வரிசையில் இருந்த அவரவர் நாற்காலிகளில் அமர்ந்தனர்.
தவபாலன் என்னைச் சுட்டிக்காட்டி, "உங்களை எவரும் அழைக்கவில்லை. ஏன் வந்தீர்கள். உங்கள் வேட்டியை புத்த மதகுருவிடம் கொடுத்தவரல்லவா? உங்களுக்கு வெட்கமில்லையா? புத்தர்கள் எங்கள் ஆக்கிரமிப்பாளர்களாச்சே?, நீங்கள் புத்த ஆதரவாளர், நீங்கள் அரசு சார்பாளர்! நீங்கள் கூட்டத்தில் பங்கேற்க முடியாது, வெளியே செல்லுங்கள்" என்றார்.
என் பக்கத்தில் அமர்ந்திருந்த பூசகரிடம், "நீங்கள் என்னை அழைத்தீர்கள், நான் இங்கே இருக்கிறேன்" என்றேன்.
இதைப் பூசகர் தவபாலனிடம் ஒப்பினார்.
மூவரும் முதலில் வெளியேறினர். வேலன் சுவாமி தொடர்ந்தார். அடுத்தடுத்துப் பங்கேற்பாளர்கள் மண்டபத்தை விட்டு வெளியேறத் தொடங்கினர்.
எனது பழைய நண்பர் திரு பூலோகசிங்கம், அவரது மனைவியுடன் சேர்ந்து, வெடுக்குநாறியை எவ்வாறு பூசை மற்றும் வழிபாட்டிற்குரியதாக்கலாம் என்பது குறித்து அரசாங்கத்தின் உள்ள பலருக்கு அவர் எழுதிய சில ஆவணங்களை எனக்குக் காட்டினார்.
கூட்ட அறையில் இருந்த நாற்காலிகளையும் அகற்றினர். நான் அமர்ந்திருந்த நாற்காலியை என்னிடம் கேட்டார்கள். மேசையில் உட்கார்ந்தேன். நெடும் பயணம். காலை உணவு உண்ணவில்லை. சோர்வடைந்தேன். எனவே மேசையிலேயே படுத்தேன்.
பெரும்பாலான பங்கேற்பாளர்கள் பூசகரின் வீட்டில் நண்பகல் உணவிற்குச் சென்றனர்., நான் அரங்கை விட்டு வெளியேறினேன். என் வீட்டிற்கு அழைத்துச் செல்லுமாறு நண்பரைக் கேட்டேன்.
