ஊரான் ஊரான்

 ஊரான் ஊரான்

தருண் நந்தினி நகுலேசுவரன்

சகலகலாவித்தியாசாலை மறவன்புலவு

ஊரான் ஊரான் வயல்களிலே 

உளுந்து விதைத்து முளைக்கையிலே 

அயலான் மாடுகள் அலைந்தனவே

அனைத்தும் அழிந்துச் சிதைத்தனவே

அடாத்தால் வளர்ச்சி தடுப்போரின்

ஊராம் மறவன் புலவாமே

ஊரான் ஊரான் தோட்டத்திலே 

நேராய் நிமிர்ந்த வெண்டிச்செடி

அவிழ்த்தார் ஆடுகள் அலையவிட 

அடாத்தாய் வேலியை உடைத்தனவே

காய்கறித் தோட்டங்கள் அழிப்பனவே

ஆடுகள் மறவன் புலவாமே

ஊரான் ஊரான் கோயிலிலே

உண்டியல் உடைப்பார் உள்ளாரே

உண்டியல் உடைத்த சண்டியரே 

கள்ளுக் கடையில் நிற்பாரே

மதுவில் மயங்கித் தள்ளாடும்

மடையர் மறவன் புலவாரே

ஊரான் ஊரான் பள்ளியிலே

படிக்கப் போகும் மாணவரே

படிப்புப் புத்தகம் உணவெல்லாம் 

கொடுப்பார் அங்கே இலவயமாய்

துடுக்காய்ப் பெடியள் பெட்டையளும்

படிக்கார் மறவன் புலவாரே

ஊரான் ஊரான் திருவிழாவில்

கோலம் போடத் தெரியாதார்

மாலை கட்டத் தெரியாதார்

சேலை உடுக்கத் தெரியாதார்

சுவையாய்ச் சமைக்க தெரியாதார்

மகளிர் மறவன் புலவாரே

ஊரான் ஊரான் பேருந்தில் 

உவந்து ஓட்டும் ஓட்டுநரும் 

நயந்து அழைக்கும் நடத்துனரும்

புத்தம் புதிய பேருந்தே

புதையும் பாதை திருத்தாத

மக்கள் மறவன் புலவாரே

ஊரான் ஊரான் கடற்கரையில்

கஞ்சா கடத்தும் தொழிலாமோ

களவாய் மணலை அகழ்வோமோ

களவாய் மாடு கொள்வோமோ

உழைக்க மறந்து திரிவோமோ

உதுவே மறவன் புலமாமோ

ஊரான் ஊரான் குளத்தருகே

நிலாவும் வள்ளைக் குளத்துள்ளே

உலாவும் மீனைக் கள்வோமோ

மலரும் தாமரை கொள்வோமோ

சுற்றிய வேலிகள் உடைப்போமோ

மற்றிது மறவன் புலமாமோ

ஊரான் ஊரான் மழையேலோ

உடைக்கும் வரம்பில் கடவானோ

சேறாய்ப் புதைக்கும் நிலமாமோ

சோறாய் முதிரும் கதிராமோ

மழையே பொழியாய் மாரியிலே

மகிழ்ச்சி மறவன் புலவினிலே

ஊரான் ஊரான் நெற்கதிரே

உழுதார் விதைக்க முளைத்தாயே

பயிராய்ப் பச்சைப் பசேலானாய்

குடலை வெடித்துக் குதிரானாய்

கதிராய் வளைந்து நெல்லானாய்

மகிழ்வார் மறவன் புலவாரே

மறவன்புலவு க. சச்சிதானந்தன்